İsrailin Həmas-ın Dohadakı qərargahına zərbə endirməsinə baxmayaraq Qətər Qəzza zolağında hərbi münaqişənin həlli üçün vasitəçilik səylərini davam etdirəcək. Bunu Qətər əmiri Şeyx Təmim bin Həməd Al Tani BMT Baş Assambleyasının 80-ci sessiyasında çıxışı zamanı deyib.
“Biz davam edən dezinformasiya kampaniyası şəraitində belə, ardıcıl olaraq müharibənin dayandırılması və girovların azad edilməsini axtarmaq niyyətindəyik. Bu cür cəhdlər bizi dayandıra bilməyəcək, ona görə də Misir və ABŞ ilə əməkdaşlıq və tərəfdaşlıq şəraitində səylərimizi davam etdirəcəyik”, – o deyib.
Əmir həmçinin İsrailin Dohaya zərbə endirməsini Qəzza zolağında atəşkəs danışıqlarını pozmaq cəhdi kimi qiymətləndirib. “Onlar ölkəmizə gəlir və eyni zamanda ona hücum planlaşdırırlar. Nümayəndə heyətləri ilə danışıqlar aparır və danışıqlar qrupunun üzvlərinə sui-qəsd planlaşdırırlar. Ən elementar əməkdaşlıq standartlarına belə hörmətsizlik edən belə bir yanaşma ilə işləmək mümkün deyil”, – o əlavə edib. (Tass)