Qax Dövlət Kukla Teatrı Yeni il bayramı günlərində uşaqlara “Qrinç: Şaxta babaya məktub” adlı əyləncəli tamaşa-kompozisiya təqdim edəcək.
Bu barədə AZƏRTAC-ın bölgə müxbirinə teatrın baş rejissoru, Əməkdar artist Yusif Abdurahmanov məlumat verib.
Tamaşanın ssenari müəllifi və quruluşçu rejissoru İlmar Abdullayev, quruluşçu rəssamı Mayis Abdullayev, musiqi tərtibatçısı Nicat Fətəliyevdir. Xüsusi proqram əsasında hazırlanmış tamaşanın əvvəlində Yeni ilin personajları Şaxta baba və Qar qız uşaqları bayram münasibətilə təbrik edəcək, onlarla birgə rəqs edib əylənəcəklər. Hazırda tamaşanın məşqləri davam edir.
2024-cü ilin repertuar planına daxil edilən Vladimir Orlovun “Qızıl cücə” əsəri əsasında səhnələşdirilən eyniadlı tamaşanın məşqləri isə artıq başa çatmaq üzrədir və dekabrın 20-də tamaşaya daxili baxış keçiriləcək. Tamaşanın quruluşçu rejissoru Araz Mehrablı, rəssamı Mayis Abdullayev, musiqi tərtibatçısı Nicat Fətəliyevdir.
Teatrda Yeni il şənlikləri dekabrın 28-dən 30-dək və yanvarın 1-dən 5-dək davam edəcək.