Bakıda keçirilən Türk Dövlətləri Təşkilatına (TDT) üzv ölkələrin QHT-lərinin həmrəylik forumu regional inteqrasiyanın canlı və əyani nümunəsi kimi diqqət çəkdi. Forum QHT-lərin dövlətlərarası əməkdaşlıqda oynadığı strateji rolu ön plana çıxarmağa xidmət etdi və Azərbaycanın bu sahədə fəal iştirakı ölkəmizin liderlik missiyasını bir daha təsdiqlədi.
Bu sözləri AZƏRTAC-a açıqlamasında politoloq Tural İsmayılov söyləyib.
O qeyd edib ki, forum TDT daxilində siyasi dialoqun və qərarların icrasının sürətlənməsinə, həmçinin sosial innovasiyaların yayılmasına, təhsil və mədəni layihələrin beynəlxalq əməkdaşlıqla birləşdirilməsinə, regional həmrəylik, həmçinin hüquqi və etik standartların uyğunlaşdırılmasına yardım göstərir. Tədbir Azərbaycanın liderliyinin vətəndaş cəmiyyəti səviyyəsində də təsdiqlənməsinə şərait yaratdı. Eyni zamanda, QHT-lərin təşəbbüsləri Türk dünyasında vahid sosial və mədəni iradənin formalaşmasına dəstək oldu.
“Forum iştirakçıları regional layihələrin prioritetlərini müəyyənləşdirmək üçün ideya və təkliflərlə çıxış etdilər. QHT-lərin təşəbbüsləri TDT-nin strateji məqsədlərinin həyata keçirilməsi baxımından da əhəmiyyətli idi. Forum iştirakçı ölkələr arasında təcrübə mübadiləsini və kommunikasiya imkanlarını genişləndirdi, QHT-lərin fəaliyyəti dayanıqlı inteqrasiya üçün vacib element kimi təsdiqləndi. Tədbir, eyni zamanda, Azərbaycan üçün həm regional nüfuz, həm də sosial liderlik göstəricisi oldu”, – deyə T.İsmayılov vurğulayıb.