Rusiya və İran Buşehr Atom Elektrik Stansiyasının ikinci və üçüncü enerji bloklarının tikintisini davam etdirmək üçün rusiyalı mütəxəssislərin təcili olaraq geri qayıtması barədə razılığa gəliblər. Bu barədə İranın energetika nazirinin müavini Mustafa Rəcəbi Məşhədi bildirib.
“ŞƏT nazirlərinin görüşü çərçivəsində Rusiya Energetika Naziri ilə ikitərəfli danışıqlar aparılıb. Görüş zamanı Rusiya tərəfi Buşehr Atom Elektrik Stansiyasının ikinci və üçüncü enerji bloklarının tikintisində iştirak edən mütəxəssislərin tezliklə İrana qayıdacağını bildirib”, – deyə o, “Fars” xəbər agentliyinə verdiyi müsahibədə bildirib.
İyunun 17-də Rosatom-un baş direktoru Aleksey Lixaçev Buşehr Atom Elektrik Stansiyası layihəsinin Rosatom üçün prioritet olaraq qaldığını bildirdi. O bildirdi ki, stansiyanın ərazisinə zərbələr riskinin minimuma endirildiyi məlum olan kimi, dövlət korporasiyasının işçiləri AES ərazisinə qayıtmağa başlayacaqlar. (Tass)