Rusiya ABŞ-ı və müttəfiqlərini İranın dinc nüvə obyektlərinə zərbə endirmək planlarından əl çəkməyə çağırır. Bunu Rusiya xarici işlər nazirinin müavini Dmitri Lyubinski Cenevrədə BMT Nizamnaməsinin Müdafiəsi üzrə Dostlar Qrupunun yüksək səviyyəli iclasında çıxış edərkən bildirib.
Nazir müavini bildirib ki, “ABŞ-ı və müttəfiqlərini İranın dinc nüvə obyektlərinə zərbə endirmək planlarından əl çəkməyə çağırırıq. Vaşinqtonun gələcək hərbi qarşıdurmanın qarşısını almaq üçün qəti zəmanətlər verməsini tövsiyə edirik”. Lyubinski həmçinin vurğulayıb ki, “Rusiya İranın dinc nüvə proqramı ilə bağlı diplomatik həll yollarının axtarışını bərpa etmək üçün bütün lazımi yardımı göstərməyə hazırdır”.
Diplomatın sözlərinə görə, dekabrın sonlarından bəri Rusiya ABŞ və müttəfiqlərinin İranda və ətrafında gərginliyi artırmaq üçün dağıdıcı addımlarını müşahidə edir. O, sözünə davam edərək bildirib ki, “Əvvəlcə Qərb etirazçıları hüquq-mühafizə orqanlarının əməkdaşlarına hücum etməyə və əsas hökumət binalarını zorakılıqla ələ keçirməyə açıq şəkildə təhrik edib. Çevriliş planı uğursuz olduqdan sonra Vaşinqton Tehranı ərazisinə zərbələr endirməklə birbaşa hədələməyə başlayıb və indi bu təhdidlər güclənir”. (Tass)