Azərbaycan və Xorvatiya arasında ticarət göstəriciləri yüksək səviyyədədir.
APA xəbər verir ki, bunu Milli Məclisin sədri Sahibə Qafarova Azərbaycanda səfərdə olan Xorvatiya parlamentinin sədri Qordan Yandrokoviçlə birgə mətbuat konfransında deyib.
“Enerji sahəsi iqtisadi əlaqələrimizdə mühüm yerə malikdir. Bildiyiniz kimi, bu gün Azərbaycan 10 Avropa, o cümlədən 8 Avropa İttifaqı ölkəsinə qaz ixrac edir ki, Xorvatiya da bu ölkələrdən biridir.
Müxtəlif sahələrdə əməkdaşlığın daha da genişləndirilməsi üçün müntəzəm müzakirələr aparılır. Bu mənada, “İqtisadi əməkdaşlığı təşviq etmək məqsədi ilə Birgə Komissiya”nın fəaliyyəti xüsusi aktuallıq kəsb edir.
Mən həmçinin Azərbaycanla Xorvatiya arasında minatəmizləmə sahəsində əməkdaşlığı vurğulamaq istərdim ki, bu əməkdaşlıq işğaldan azad olunmuş ərazilərimizin minalardan təmizlənməsi baxımından əhəmiyyətə malikdir.
Bugünkü görüşümüzdə əsas diqqət yetirdiyimiz məsələlərdən biri, əlbəttə ki, parlamentlərimiz arasında əlaqələr oldu. Hər iki parlamentdə dostluq qrupları fəaliyyət göstərir. Nümayəndə heyətlərimiz qarşılıqlı olaraq parlamentlərimizin təşkil etdiyi tədbirlərdə, bir sıra beynəlxalq parlament təşkilatlarının işində birgə iştirak edirlər”, – Sahibə Qafarova qeyd edib.
Milli Məclisin sədri parlament üzvlərinin daha sıx əməkdaşlıq yolu ilə hər iki ölkənin xalqlarının bir-birinə yaxınlaşdırılması və ikitərəfli əlaqələrin inkişafında əhəmiyyətli rol oynayacağını vurğulayıb.