Amerikalı iqtisadçı və Kolumbiya Universitetinin (Nyu-York) Davamlı İnkişaf Mərkəzinin direktoru, professor Ceffri Saksın fikrincə, eskalasiya davam edərsə, ABŞ və İsrailin İrana qarşı hərbi əməliyyatları Üçüncü Dünya Müharibəsinə çevrilə bilər.
“Müharibə yalnız ABŞ və İsrail təcavüzünə qarşı qlobal nifrət bu ölkələri dayandırmağa məcbur etdikdə başa çatacaq. Əks təqdirdə, çox güman ki, Yaxın Şərq alovlanacaq. Münaqişə asanlıqla qlobal yanğına, faktiki olaraq üçüncü dünya müharibəsinə çevrilə bilər”, – deyə o, Yaponiyanın Nikkei Asia portalına verdiyi müsahibədə bildirib.
Saks əlavə edib ki, ABŞ və İsrail “ərəb dünyasında və Qərbi Asiyada hegemonluq qurmaqda qərarlı olduqları üçün” döyüşlər nəzarətdən çıxa bilər. O hesab edir ki, iki ölkənin əsas məqsədi “bütün tarixi Fələstini udacaq”, ərəb ölkələrini suverenliklərindən məhrum edəcək və bölgədən neft və qaz ixracına nəzarət edəcək “Böyük İsrail” yaratmaqdır.
Professor vurğuladı ki, Amerika administrasiyası və yəhudi dövləti region ölkələrinin “İsrailin bu qədər nəzarətsiz davranmasını istədiyinə” inanmaqda səhv edirlər. Ekspertin sözlərinə görə, heç bir ölkə ABŞ-ın enerji ixracına nəzarət etməsini istəməz. Saks xəbərdarlıq edib ki, Yaxın Şərqdə düşmənçilik davam edərsə, dünya görünməmiş enerji böhranına qərq olacaq və iqtisadi nəticələr “fəlakətli” ola bilər. (Tass)