ABŞ prezidenti Donald Tramp gürcü həmkarı Mixeil Kavelaşvilini Müstəqillik Günü münasibətilə təbrik edib və iki ölkə arasında münasibətlərin 2026-cı ildə bərpa olunacağına ümid etdiyini bildirib. Bu barədə Gürcüstan prezident administrasiyası məlumat verib.
Tramp təbrik məktubunda bildirib: “Amerika Birləşmiş Ştatları adından Gürcüstan xalqını milli bayramları münasibətilə təbrik edirəm. Bu il bizə Amerika və Gürcüstan xalqları arasında əlaqələri yeniləmək üçün yeni imkanlar təqdim edir və ölkələrimizin təhlükəsizliyinə və rifahına töhfə verir. Amerika Birləşmiş Ştatları Gürcüstanın beynəlxalq səviyyədə tanınmış sərhədləri daxilində suverenliyini və ərazi bütövlüyünü dəstəkləməkdə qətiyyətlidir”.
Ağ Ev rəhbəri həmçinin qeyd edib ki, ABŞ gürcü xalqının davamlı təhlükəsizlik, öz müqəddəratını təyinetmə və müstəqillik arzularını dəstəkləyir. (Tass)