ABŞ prezidenti Donald Tramp Rusiyaya sanksiyalar vasitəsilə təzyiq göstərmək strategiyasından imtina edərək, Ukraynadakı münaqişənin həlli prosesinə yeni yanaşma tətbiq etmək qərarına gəlib.
Ritorika.az xəbər verir ki, bu barədə “The Atlantic” jurnalı məlumat yayıb.
Noyabrın 19-da Volodimir Zelenski ilə danışıqlardan sonra ABŞ-nin ordu katibi Daniel Driskoll Kiyevdəki ABŞ səfirinin iqamətgahında avropalı diplomatlarla görüş keçirib. Diplomatların ABŞ-nin sanksiyalardan imtina addımına dair suallarını cavablandıran Driskoll qeyd edib ki, Tramp “müharibəyə son qoymağın əvvəlki yollarının nəticə vermədiyi üçün” yeni yanaşmaya keçmək niyyətindədir. Jurnalın mənbəsi bu yanaşmanın detalları barədə məlumat verməyib.
Xatırladaq ki, ABŞ bundan əvvəl Ukrayna üçün 28 bəndlik sülh planı təqdim etmişdi. Lakin bu sənəd Kiyev və Avropa tərəfdaşları tərəfindən narazılıqla qarşılanmış, onlar bir sıra düzəlişlər etməyə çalışmışdılar. Noyabrın 23-də ABŞ və Ukrayna nümayəndə heyətləri Cenevrədə plan üzrə məsləhətləşmələr aparıblar. “RBC-Ukrayna” xəbər verir ki, tərəflər Vaşinqtonun təklif etdiyi maddələrin böyük hissəsi üzrə razılığa gəliblər. Bununla belə, Tramp və Zelenski arasında keçiriləcək, lakin hələ tarixi açıqlanmayan görüşdə bir neçə əsas məqam müzakirə olunmaq üçün saxlanılıb.
Daha sonra Donald Tramp sülh planındakı bəndlərin sayının 28-dən 22-yə endirildiyini bildirib.
Ritorika.az