Böyük Britaniya Kralı III Çarlz ABŞ Konqresində dövlət səfəri zamanı çıxış edərkən ABŞ Prezidenti Donald Trampın alyansa qarşı tənqidləri fonunda NATO-nun qorunmasının vacibliyini bildirib.
“Atlantik okeanının dərinliklərindən Arktikanın əriyən buzlaqlarına qədər, ABŞ Silahlı Qüvvələrinin və müttəfiqlərimizin fədakarlığı və təcrübəsi NATO-nun mərkəzindədir. Burada millətlər bir-birini qorumağa, vətəndaşlarımızı və maraqlarımızı müdafiə etməyə və Şimali Amerikalıların və avropalıların ümumi düşmənlərimizdən təhlükəsizliyini təmin etməyə sadiqdirlər. Müdafiə, kəşfiyyat və təhlükəsizlik tərəfdaşlığımız illərlə deyil, onilliklərlə ölçülən münasibətlərlə ayrılmaz şəkildə bağlıdır”, – deyə monarx bildirib.
O, həmçinin Trampın tələb etdiyi kimi, Böyük Britaniyanın müdafiə xərclərini artırmasının vacibliyini vurğuladı. “Birləşmiş Krallıq üzləşdiyimiz təhdidlərin Britaniya müdafiəsinin transformasiyasını tələb etdiyini anlayır. Buna görə də ölkəmiz gələcəyə hazırlaşmaq üçün Soyuq Müharibədən bəri müdafiə xərclərinin ən böyük davamlı artımına sadiq qalıb”, – deyə III Çarlz qeyd etdi. O, həmçinin “həqiqətən ədalətli və davamlı sülhə” nail olmaq üçün Ukraynaya kömək etməyə çağırıb.
III Çarlzın bu sözləri Trampın həm NATO, həm də Britaniyanın hərbi qüdrətini tənqid etməsi fonunda səsləndi. Amerika liderinin narazılığı Vaşinqtonun Avropa müttəfiqlərinin, o cümlədən Britaniyanın ABŞ-ın İrana qarşı müharibəsini dəstəkləməkdən imtina etməsindən irəli gəlirdi. O vaxtdan bəri Tramp NATO üzvlüyü ilə bağlı dəfələrlə şübhələrini bildirib. (Tass )