Son illərdə Azərbaycan və Türkmənistan arasında münasibətlərin dinamik inkişafı Türk dünyasında əməkdaşlığın yeni məzmun qazanmasına və regional inteqrasiyanın daha praktik mərhələyə keçməsinə şərait yaradıb. Ortaq tarix, mədəni yaxınlıq və qarşılıqlı siyasi iradə üzərində qurulan bu münasibətlər artıq yalnız ikitərəfli əlaqələr deyil, bütövlükdə Avrasiya məkanında formalaşan yeni geosiyasi və geoiqtisadi reallıqların mühüm elementlərindən biri kimi qiymətləndirilir.
Bunu AZƏRTAC-a açıqlamasında Türk İslam Araşdırmaları Mərkəzinin sədri Telman Nüsrətoğlu bildirib.
Mərkəz sədri qeyd edib ki, Azərbaycan və Türkmənistan arasında münasibətlərin dərinləşməsi Türk dünyasının uzunmüddətli inkişaf strategiyasının mühüm hissəsidir. Onun sözlərinə görə, hər iki ölkə ortaq oğuz-türk tarixi və ortaq mədəni kodlar üzərində formalaşmış dövlətlər kimi yalnız keçmişin deyil, gələcəyin də ortaq baxışını bölüşür.
“Türk xalqlarının ortaq tarixinin əsas xüsusiyyətlərindən biri müxtəlif coğrafiyalarda yaşasalar da vahid sivilizasiya düşüncəsini qoruyub saxlamalarıdır. Müasir dövrdə bu birlik artıq yalnız mədəni sahədə deyil, enerji, nəqliyyat, texnologiya və iqtisadi əməkdaşlıq müstəvisində də özünü göstərir. Xəzər hövzəsi ətrafında formalaşan yeni əməkdaşlıq modeli regionun gələcək inkişaf trayektoriyasını müəyyənləşdirən əsas faktorlardan birinə çevrilir. Bu baxımdan Azərbaycan və Türkmənistan arasında dəniz nəqliyyatı, logistika və enerji sahələrində həyata keçirilən layihələr xüsusi əhəmiyyət daşıyır. Orta Dəhliz boyunca artan yük axını və region ölkələrinin bu marşruta marağının yüksəlməsi Azərbaycanın tranzit mərkəzi kimi rolunu gücləndirir və Türkmənistan üçün də yeni iqtisadi imkanlar yaradır. Türk dövlətləri arasında inteqrasiyanın əsas istiqamətlərindən biri enerji təhlükəsizliyi məsələsidir. Enerji artıq təkcə iqtisadi resurs deyil, geosiyasi təsir alətidir. Bu baxımdan Azərbaycanın enerji diplomatiyası ilə Türkmənistanın resurs potensialının uyğunlaşdırılması geniş regional əməkdaşlıq perspektivləri yaradır”, – deyə Telman Nüsrətoğlu qeyd edib.
Mərkəz sədri qeyd edib ki, son illərdə qarşılıqlı etimadın möhkəmlənməsi nəticəsində bir sıra strateji təşəbbüslər reallaşmağa başlayıb. Xəzər dənizində ortaq yanaşmanın formalaşması, nəqliyyat marşrutlarının genişləndirilməsi və iqtisadi əlaqələrin dərinləşdirilməsi bu prosesin əsas göstəricilərindəndir. Onun sözlərinə görə, Türk dünyasının inkişafı yalnız iqtisadi layihələrlə məhdudlaşmamalıdır: “Uzunmüddətli inteqrasiya üçün ortaq təhsil məkanı, akademik əməkdaşlıq, elmi araşdırmalar, mədəniyyət mübadiləsi və gənclərin ortaq platformalarda iştirakı vacibdir. Dövlətlərarası əməkdaşlığın cəmiyyətlər səviyyəsində dəstəklənməsi dayanıqlı nəticələr yaradır. Qarşıdakı dövrdə yaşıl enerji, rəqəmsal transformasiya, sənaye əməkdaşlığı, innovasiya və yüksək texnologiyalar sahəsində ortaq layihələrin reallaşdırılması Türk dövlətləri arasında əlaqələrin keyfiyyətcə yeni mərhələyə keçməsinə səbəb olacaq. Azərbaycanın son illərdə həyata keçirdiyi xarici siyasət kursu regionda qarşılıqlı etimadın və əməkdaşlıq mühitinin güclənməsinə ciddi töhfə verir. Türk dünyasının 2040 baxışı çərçivəsində nəqliyyat, enerji, ticarət, humanitar və texnoloji sahələr üzrə inteqrasiyanın gücləndirilməsi gələcək nəsillər üçün daha güclü regional platforma yaradacaq”.
Ekspert bildirib ki, Azərbaycan–Türkmənistan münasibətlərinin hazırkı inkişaf tempi gələcək illərdə daha genişmiqyaslı regional əməkdaşlıq modelinin formalaşmasına zəmin yaradır və bu proses Türk dünyasında birlik ideyasının praktik nəticələrə çevrildiyini göstərir.