Türkiyə Xarici İşlər Nazirliyi Ukraynanın Çornomorsk limanı yaxınlığında gəmiyə dron hücumu nəticəsində quru yük gəmisinin heyət üzvləri olan iki Türkiyə vətəndaşının yaralandığını bildirib.
Departamentin veb saytında dərc olunmuş açıqlamada deyilir: “Bu səhər, 22 iyun tarixində Ukraynanın Çornomorsk limanı yaxınlığında dron hücumuna məruz qalan Panama bayrağı altında üzən Türkiyə gəmisində iki vətəndaşımızın yaralandığı bildirilib. Vətəndaşlarımızın vəziyyəti Kiyevdəki səfirliyimiz və Odessadakı baş konsulluğumuz tərəfindən yaxından izlənilir”.
Türkiyə Xarici İşlər Nazirliyi qeyd edib ki, Ukraynadakı münaqişənin gərginləşməsi nəticəsində baş verən hücumlar “Türkiyənin Qara dənizdəki maraqlarını və regional təhlükəsizliyini təhdid edir”. Nazirlik həmçinin “hər iki ölkənin (Ukrayna və Rusiya ) hakimiyyət orqanlarına narahatlığını bildirib”. (Tass)