Azərbaycanın sədrliyi ilə Türk Dövlətləri Təşkilatına üzv ölkələrinin vahid QHT platformasının yaradılması Təşkilatın institusional imicini əhəmiyyətli dərəcədə gücləndirir. Türk inteqrasiyasının sosial bazasını genişləndirən və Türk Dövlətləri Təşkilatı daxilində prosesləri daha şəffaf və inklüziv edən yeni ictimai diplomatiya mexanizmi yaranır. Bu, Türk Dövlətləri Təşkilatının təkcə hökumətlərarası qərarlara deyil, həm də vətəndaş cəmiyyətinin fəal iştirakına əsaslanan müasir bir struktur kimi qəbulunu gücləndirir.
Bu fikri AZƏRTAC-a açıqlamasında türkiyəli politoloq və Ankara Universitetinin professoru Toğrul İsmayıl Türk Dövlətləri Təşkilatına üzv ölkələrinin vahid QHT platformasının yaradılmasını şərh edərkən bildirib.
Ekspert hesab edir ki, Azərbaycanın təşəbbüsü onun türk əməkdaşlığının inkişafı üçün gündəm müəyyən etmək və sistemli yanaşmalar təklif etmək qabiliyyətinə malik bir dövlət kimi statusunu artırır. “Bakı cəmiyyətlər arasında üfüqi əlaqələrin yaradılmasında liderlik nümayiş etdirir və bununla da inteqrasiya proseslərinin təşkilati dayanıqlığını və davamlılığını gücləndirir. Azərbaycanın əlaqələndirici rolu daha çox nəzərə çarpır, çünki məhz o, TDT çərçivəsində QHT sektorunun inkişaf istiqamətini və qarşılıqlı fəaliyyətin yeni standartlarını müəyyən edir”, – deyə Toğrul İsmayıl izah edir.
Platformanın yalnız Türk Dövlətləri Təşkilatının funksional imkanlarını genişləndirmədiyini vurğulayan Ankara Universitetinin professoru bildirib ki, o, Bakının siyasi təşəbbüskarlığı, diplomatik çevikliyi və müasir çağırışlara cavab verən inteqrasiya modelləri yaratmaq qabiliyyətini birləşdirən hərəkətverici qüvvə kimi imicini möhkəmləndirir.