Qara dənizdə Türkiyənin ticarət gəmilərinə edilən hücumlar qlobal enerji dəhlizləri üçün təhlükə yaradır. Bu barədə Türkiyənin energetika naziri Alparslan Bayraktar A Haber televiziya kanalında bildirib.
“Hazırda aşağıdakı vəziyyətlə üzləşirik: Ukrayna münaqişəsi davam edir və enerji infrastrukturu onun əsas hədəfinə çevrilib. Qara dənizdə tankerlərə hücum və təqiblər edilir. Eyni şey Aralıq dənizində, Xəzər dənizində baş verir və Hörmüz boğazı buna bariz nümunədir. Bu, qlobal enerji dəhlizləri üçün risk yaradır”, – deyə o bildirib.
Türkiyə Xarici İşlər Nazirliyi əvvəllər Ukrayna Silahlı Qüvvələrinin 3 avqustda Novorossiysk yaxınlığında “Nadejda” və “Yasar” quru yük gəmilərinə hücumundan sonra Qara dənizdə münaqişənin gərginləşməsi ilə bağlı ciddi narahatlığını bildirmişdi. Nazirliyin bəyanatında qeyd olunur ki, təhlükəni azaltmaq üçün qabaqlayıcı tədbirlər görülməsə, ərzaq təhlükəsizliyi də daxil olmaqla, ciddi nəticələrə səbəb olacaq.
Öz növbəsində, Türkiyənin Milli Təhlükəsizlik Şurası cümə axşamı günü Türkiyənin ticarət gəmilərinə artan hücumlar fonunda Qara dənizdə gərginliyin azaldılmasının vacibliyini bildirib. (Tass)