İqlim dəyişikliyi reallıqdır, gələcəkdə bunun mənfi təsirlərini görmək mümkün olacaq.
“Report” xəbər verir ki, bunu Azərbaycanın ekologiya və təbii sərvətlər nazirinin müavini Umayra Tağıyeva Bakı İqlim Fəaliyyəti Həftəsində (BCAW2025) çıxışı zamanı deyib.
Onun sözlərinə görə, artıq dünya ölkələri adaptasiya mərhələsinə keçməlidir:
“Azərbaycanın iqlim dəyişiliyi ilə bağlı adaptasiya planı var. Bu məsələ COP29-da da müzakirə edildi. Adaptasiya hədəflərində innovasiyalardan, müasir texnologiyalardan istifadə edilməlidir. Bəzi hallarda ekosistemə əsaslanan hədəflər daha effektiv nəticələr verə bilər”.
Nazir müavini bildirib ki, Azərbaycan iqlim sahəsində BMT Baş katibliyi ilə əməkdaşlıq edir, texniki dəstək alır:
“Azərbaycan iqlim dəyişikliyinin qarşısını almaq üçün daha çox layihələr hazırlayacaq və beynəlxalq məkana töhfə verməyə çalışacaq”.
U.Tağıyeva Xəzəryanı ölkələrin iqlim dəyişikliyi ilə mübarizədə bərabər fəaliyyətinə də diqqət çəkib.