ABŞ-ın vitse-prezidenti J.D. Vance İrana qarşı hərbi əməliyyatların bərpa olunma ehtimalını istisna etməyib.
“Heç nə vəd edə bilmərəm, çünki əlbəttə ki, bu, iranlıların sonda necə davranmasından asılıdır. Əmin olduğum odur ki, prezident zərurət yaranmadıqca, dəqiq müəyyən edilmiş bir məqsəd olmadığı təqdirdə qoşunlarımızı geri göndərməyəcək”, – deyə Vance Virciniya ştatının Virciniya Biç şəhərindən yola düşməzdən əvvəl jurnalistlərə ABŞ-ın İrana qarşı hərbi əməliyyatları bərpa etməyəcəyinə zəmanət verə biləcəyi soruşulduqda bildirib.
ABŞ vitse-prezidenti vurğulayıb ki, “Əlavə tədbirlər görüb-görməməyimiz iranlıların öz ixtiyarındadır. Əgər onlar nüvə proqramlarını bərpa etmək qərarına gəlsələr, yenidən kommersiya gəmiçiliyini hədəf almağa başlasalar, bu, hesablamalarımızı dəyişdirəcək”. O, həmçinin ABŞ və İran rəsmiləri arasında texniki məsləhətləşmələrin gedişatını yüksək qiymətləndirib. “Nəticələri barədə danışmaq hələ tezdir, amma işlər yaxşı gedir”, – deyə o vurğulayıb. (Tass)