Xocalı faciəsi heç vaxt unudulmayacaq. Çünki bu hadisə təkcə keçmişin ağrısı deyil, həm də gələcək üçün bir dərsdir. Bu dəhşətli hadisənin xatirəsini əbədiləşdirmək məqsədilə yaradılan Xocalı Soyqırımı Memorial Kompleksi yalnız bir abidə deyil, həm də milli yaddaşın, ədalət çağırışının və gələcək nəsillərə ötürülən tarixi həqiqətin simvoludur.
Bunu AZƏRTAC-a açıqlamasında “Qarabağ” İnformasiya – Kommunikasiya Texnologiyaları Gənclər ictimai birliyinin sədri Nurəddin Mehdiyev deyib.
İB sədri qeyd edib ki, Xocalı Soyqırımı Memorial Kompleksi həm də cəmiyyətə bir mesaj verir – tarix unudulmamalıdır: “Yaddaşın qorunması xalqın kimliyinin, mənəvi dəyərlərinin və milli birliyinin əsas şərtlərindən biridir. Bu baxımdan memorial, həm kollektiv hüznün ifadəsi, həm də milli həmrəyliyin təcəssümüdür. Memorial Kompleks gənc nəsillərə tariximizi öyrənmək, şəhidlərimizin xatirəsini yaşatmaq və ədalət ideyasını qorumaq məsuliyyətini aşılayır. Bu məkan həm kədərin, həm də milli qürurun rəmzidir. Kədər – günahsız insanların itkisindən doğan ağrını ifadə edir; milli qürur isə xalqımızın çətin sınaqlardan keçərək birliyini, mübarizə ruhunu və tarixi həqiqətləri dünyaya çatdırmaq əzmini nümayiş etdirir. Xocalı Soyqırımı Memorial Kompleksi yaddaşın əbədi məşəli kimi gələcək nəsillərə ötürülən müqəddəs and yeri, Azərbaycan xalqının əyilməz ruhunun simvoludur”, – deyə N. Mehdiyev qeyd edib.