Yunanıstanın Gəmiçilik və Ada Siyasəti Nazirliyi, Yunanıstan şirkəti tərəfindən icarəyə götürülmüş Epaminondas gəmisinin İslam İnqilabı Keşikçiləri Korpusu (İİKK) tərəfindən ələ keçirildiyi və gəminin kapitanının komandanlığı altında olduğu barədə məlumatları təkzib edib. Bu barədə “Kathimerini” qəzeti məlumat yayıb.
İİKK Hərbi Dəniz Qüvvələri əvvəllər bildirib ki, “dəniz təhlükəsizliyini təhdid edən, lazımi icazələri olmayan və naviqasiya sistemlərinə müdaxilə edən” Panama bayrağı altında üzən MSC Francesca və Liberiya bayrağı altında üzən Epaminondas gəmiləri İİKK Hərbi Dəniz Qüvvələri tərəfindən ələ keçirilərək İran sahillərinə aparılıb.
Nəşrin məlumatına görə, Danimarkanın Maersk şirkəti tərəfindən idarə olunan və Yunanıstan gəmi sahibi Corc Yurukosun Technomar qrupu tərəfindən icarəyə götürülmüş Epaminondas konteyner gəmisi İran suları yaxınlığında üzərkən atəşə tutulub. Liberiya bayrağı altında üzən gəminin heyəti 21 dənizçidən ibarətdir və onların hamısı Ukrayna və Filippin vətəndaşlarıdır. Yunanıstanın Gəmiçilik və Ada İşləri Nazirliyi gəminin qaçırılmadığını, İran sahillərində hərəkətsiz olduğunu və kapitanının komandanlığı altında olduğunu bildirib. (Tass)