“IT SkillSprint” proqramı Rəqəmsal İnkişaf və Nəqliyyat Nazirliyi, Elm və Təhsil Nazirliyinin birgə təşəbbüsü ilə həyata keçirilir. Layihədə 123 tələbə iştirak edir.
AZƏRTAC xəbər verir ki, bunu jurnalistlərə açıqlamasında Elm və Təhsil Nazirliyi yanında Elm və Ali Təhsil üzrə Dövlət Agentliyinin sədri Ülkər Səttarova bildirib.
Onun sözlərinə görə, “IT SkillSprint” proqramı azərbaycanlı tələbələrin qlobal bazarda çox asanlıqla özlərinə iş tapmalarına töhfə verəcək.
“Onlar çox böyük seçim prosesindən keçiblər. Tələbələrin ixtisasları əsasən, İT yönümlü ixtisaslardan seçilib. Onlar bir semestr ərzində, bir neçə ay ərzində xüsusi intensiv kursdan keçəcəklər. Bu kurs xarici şirkət tərəfindən təqdim olunur. Layihə tələbələrin İT sahəsində olan bilik və bacarıqlarını daha da yaxşı inkişaf etdirməsi üçün nəzərdə tutulub. Biz çalışacağıq ki, tələbələr bir semestr ərzində dərindən tədrisə fokuslansınlar. Düşünürəm ki, bu layihənin sonunda tələbələrin bilik və bacarıqları xeyli artacaq. Xarici təcrübə də onların gələcəkdə həm yerli, həm qlobal bazarda çox asanlıqla özlərinə iş tapmalarına və bizə lazım olan səviyyədə İT biliklərinə sahib olmalarına töhfə verəcək”, – deyə agentliyin sədri vurğulayıb