Almaniya hazırda İsrailə qarşı birtərəfli sanksiyalar tətbiq etməyi planlaşdırmır. Berlin İsrail sakinlərinə qarşı məhdudiyyətlər üzrə hərəkətlərini Aİ səviyyəsində əlaqələndirir. Bu barədə Almaniyanın xarici işlər naziri Yohan Vadeful bildirib.
“Biz bu məsələlərlə bağlı hərəkətlərimizi Avropa səviyyəsində əlaqələndiririk. Tətbiq etdiyimiz sanksiyalar – və keçmişdə məskunlaşmış təşkilatlara qarşı bəzi sanksiyalar tətbiq etmişik ki, bu da yeni bir şey deyil – biz Aİ səviyyəsində əlaqələndiririk. Və mən hazırda bu məsələnin gələn həftə gündəmdə olacağından əmin deyiləm. Amma əgər gündəmdə olarsa, biz bunu avropalı tərəfdaşlarımızla müzakirə edəcəyik”, – deyə Vadeful Berlində macarıstanlı həmkarı Anita Orbanla birgə mətbuat konfransında Almaniya hökumətinin yəhudi məskunlaşmışlara və İsrail hökumət rəsmilərinə qarşı öz sanksiyalarını tətbiq etməyi düşünüb-düşünməməsi ilə bağlı suala cavab olaraq bildirib.
Almaniya xarici işlər naziri Almaniyanın “beynəlxalq hüquq məsələsində aydın mövqeyi” olduğunu vurğuladı. “Biz İsrail hökumətinə açıq şəkildə bildirdik ki, fikrimizcə, bu qanunsuz məskunlaşma siyasəti hazırkı formada davam etdirilməməlidir. Xüsusilə də E1 (İsrailin Qərb Şəriyəsində yəhudi məskunlaşmalarının inkişafı və genişləndirilməsi planlarından biri) kimi layihələr bütün Oslo Sazişlərinin (münaqişənin sülh yolu ilə həlli məqsədi ilə İsrail hökuməti ilə Fələstin Azadlıq Təşkilatı arasında 1993-cü ildən 1995-ci ilə qədər imzalanmış bir sıra gizli danışıqlar və sazişlər) pozulması deməkdir”, – deyə o bildirib və əlavə edib ki, Berlin buna diqqət yetirməyə davam edir.
“Və bu məqamda Almaniya federal hökuməti səsimizin İsraildə eşidildiyini və hazırda əlavə tədbirlərə ehtiyac olmadığını düşünür”, – deyə Vadeful yekunlaşdırıb. (Tass)