Oktyabrın 7-dən 9-dək Özbəkistanın innovativ elmi-istehsal əczaçılıq klasteri olan “Tashkent Pharma Park” texnoparkında Qlobal Əczaçılıq Liderləri Klubu ilə birgə təşkil olunan VI Avrasiya Farmasevtika Sammiti keçirilir.
AZƏRTAC özbək mediasına istinadla xəbər verir ki, əczaçılıq sənayesi, innovasiyalar, dövlət-özəl tərəfdaşlığın inkişafı və sənayenin davamlılığının təmin edilməsində əsas sahələrə həsr olunmuş sammit iştirakçılara qabaqcıl yanaşmaları müzakirə etmək üçün dəyərli platforma təqdim edir. Tədbirdə 11 ölkədən 300-dən çox mütəxəssis, o cümlədən Azərbaycan, Özbəkistan, Qazaxıstan, Qırğızıstan, və Gürcüstanın əczaçılıq sənayesi tənzimləyiciləri, beynəlxalq və yerli farmasevtika şirkətlərinin rəhbərləri, distribütorlar, apteklər şəbəkəsinin nümayəndələri və sosial proqramlar üzrə ekspertlər iştirak edirlər.
Özbəkistan Səhiyyə Nazirliyi yanında Əczaçılıq Sənayesinin İnkişafı Agentliyinin direktoru Abdulla Əzizov Avrasiya ölkələri arasında farmasevtika sahəsində əməkdaşlığın dərinləşdirilməsi üzrə hesabat təqdim edib.
Sammitdə hökumətlərin təşəbbüsləri, yerli istehsalçılar və beynəlxalq tərəfdaşlıqlar vasitəsilə əhalinin yüksəkkeyfiyyətli və münasib qiymətə dərman vasitələrinə çıxışının təmin edilməsi ilə bağlı məsələlər müzakirə edilib. Qiymətləndirmə və təchizat zəncirinin rəqəmsallaşdırılması yolu ilə ictimai etimadın gücləndirilməsi, elektron reyestrlər və etiketləmə sistemləri vasitəsilə dərman vasitələrinin təhlükəsizliyinin və effektivliyinin təmin edilməsi, sənayenin gələcəyinin modelləşdirilməsi və ictimai maraqlara cavab verən həllərin işlənib hazırlanması ilə bağlı fikir mübadiləsi aparılıb.
Tədbir çərçivəsində bir sıra beynəlxalq görüşlər keçirilir və razılaşmalar əldə olunur. Tərəflər əməkdaşlığın inkişaf etdirilməsi, elmi-tədqiqat işlərinin gücləndirilməsi, yüksək texnologiyalı dərmanların yerli istehsalı imkanlarını müzakirə edirlər.
Qonaqlar, həmçinin “Tashkent Pharma Park” texnoparkının fəaliyyəti, onun imkanları, həyata keçirilən layihələr, gələcək inkişaf istiqamətləri haqqında da məlumat əldə ediblər.
VI Avrasiya Farmasevtika Sammiti oktyabrın 9-da başa çatacaq.