Birləşmiş Krallıq Fransadan çoxmillətli koalisiya qüvvələrinin komandanlığını öz üzərinə götürüb və münaqişə bitərsə, Ukraynaya sülhməramlı qoşunlar göndərə bilər. Bu barədə Böyük Britaniya Müdafiə Nazirliyi məlumat yayıb.
Mərasim Parisdəki koalisiya qərargahında baş tutdu. Komandanlıq fransız həmkarından britaniyalı general-leytenant Tom Batemana keçib. O, 30 ildən çox Britaniya Silahlı Qüvvələrində xidmət etmiş, dünyanın istənilən yerində böhran və münaqişələrə tez reaksiya vermək üçün yaradılmış Daimi Birgə Qərargah Sürətli Reaksiya Qüvvələrinin komandiri vəzifəsində çalışmışdır. O, həmçinin Britaniya Ordusunun 1-ci Diviziyasına komandanlıq etmişdir.
Müdafiə Nazirliyi qeyd edib ki, sülh əldə olunarsa, Ukrayna üçün çoxmillətli qüvvələr Ukraynanın hava və dəniz məkanından daha təhlükəsiz istifadəni təmin edəcək və Ukraynanın quru qüvvələrinin döyüş hazırlığının bərpasına kömək edəcək. Bu missiyanın bir hissəsi olaraq Kiyevdə də qərargah yaradılacaq.