Qarabağın bərpası bu gün təkcə Azərbaycan üçün deyil, bütün Türk dünyası üçün böyük əhəmiyyət daşıyan tarixi quruculuq prosesidir. Özbəkistan ilk gündən bu nəcib təşəbbüsü dəstəkləyib və azad olunmuş ərazilərin bərpası və inkişafına praktiki töhfə verir.
Bu sözləri AZƏRTAC-a müsahibəsində Qlobal Cənub QHT Platformasının üzvü, Özbəkistanın Qardaşlaşmış Şəhərlər Alyansının sədri Zakir Abidov deyib.
“Özbəkistanın iştirakı ilə Qarabağda müasir sosial infrastrukturun yaradılması, məktəblərin, məktəbəqədər təhsil müəssisələrinin və digər sosial obyektlərin tikintisi istiqamətində mühüm layihələr həyata keçirilib. Azərbaycan Prezidenti İlham Əliyevin qeyd etdiyi kimi, Qarabağın bərpası prosesində ilk yardım əlini uzadan ölkə məhz Özbəkistan olub. Füzuli şəhərində inşa edilərək istifadəyə verilmiş müasir ümumtəhsil məktəbi xalqlarımız arasında qardaşlıq və dostluğun parlaq rəmzinə çevrilib”, – deyə Z.Abidov bildirib.
Onun sözlərinə görə, Özbəkistan investisiyalarının iştirakı ilə Qarabağda yaradılan ilk yüngül sənaye müəssisəsi burada yeni iş yerlərinin açılmasına, regionun iqtisadiyyatının dirçəldilməsinə və yerli istehsalın inkişafına töhfə verəcək.