Türkiyənin xarici işlər naziri Hakan Fidan Ankara və Vaşinqtonun Türkiyənin beşinci nəsil Kaan qırıcı təyyarələri üçün F110 mühərriklərinin tədarükü ilə bağlı bundan sonra heç bir problem yaşamayacağına ümid etdiyini bildirib.
Nazir TRT -də bildirib ki, “ABŞ Konqresinə F110 mühərrikləri ilə bağlı etirazların təqdim edilməsi üçün son tarix dünən başa çatıb. Buna görə də ümid edirəm ki, bu məsələdə başqa problem yaranmayacaq”. Məlumata görə, Türkiyə bir neçə GE Aerospace F110 mühərriki alıb və ən azı 80 ədəd daha almaq niyyətindədir.
Fidan həmçinin vurğulayıb ki, Türkiyənin müttəfiqləri “heç bir məsələyə sanksiya tətbiq etməməlidirlər”. “Türkiyə heç vaxt milli təhlükəsizliyə güzəştə getməyəcək. Müttəfiqlərimizlə birgə müəyyən [müdafiə] imkanlarını əldə etməkdə və ya inkişaf etdirməkdə çətinlik çəksək, sadəcə dayanmayacağıq; alternativ həll yolları axtaracağıq”, – deyə o bildirib. (Tass)