İsrailin xarici işlər naziri Gideon Saar Türkiyənin xarici işlər naziri Hakan Fidanın İsrail siyasətinin Suriyaya qeyri-sabitlik yaradan təsir göstərdiyini iddia edən tənqidlərini rədd etdi. O, Türkiyəni Suriyanın suverenliyini pozmaqda və ərazisini işğal etməkdə ittiham edərək cavab verib.
Saar X-də yazıb: “Türkiyənin xarici işlər naziri Hakan Fidan İsraili ‘Suriyanı qeyri-sabitləşdirməkdə’ günahlandırır, çünki biz İsrail vətəndaşlarını hücumlardan qorumaq üçün lazım olan minimum tədbirləri görürük. Bunlar onilliklərdir ki, Suriyanın suverenliyini pozan və başqalarına beynəlxalq hüquq barədə kinayəli şəkildə dərs keçən eyni türk liderləridir”.
İsrail nazirinin sözlərinə görə, “Türkiyə Suriya ərazisinin 5%-ni işğal edir və İsrailin təhlükəsizliyini pozmaq üçün Suriya daxilində hərbi bazalar yaratmaq niyyətindədir.” “Müqayisə üçün, İsrail Suriya yaraqlılarının 1974-cü ildə İsrail və Suriya arasında qüvvələrin ayrılması haqqında sazişi pozub 2024-cü ilin dekabrında bufer zonasına daxil olmasından sonra özünü cənubi Suriyadan İsrailə hücum etmək istəyən terrorçu qruplardan qorumaq üçün Suriya ərazisinin yalnız onda bir faizini təşkil edən bufer zonasına nəzarət edir”, – deyə o, bildirib.
Saar həmçinin Ankaranı “Suriya və İraq boyunca kürdlərə qarşı genişmiqyaslı hərbi kampaniyalar” aparmaqda günahlandırdı və Kipr ərazisinin 36%-nin Türkiyəyönlü qüvvələrin nəzarəti altında olduğunu xatırladıb.