Şimali Kiprdə istiqlal şairimiz, rəsmi dövlət himninin sözlərinin müəllifi Əhməd Cavad anılıb.
AZƏRTAC xəbər verir ki, Ankara Sosial Elmlər Universitetinin (ASBÜ) Şimali Kipr kampusunda “Azərbaycan istiqlal şairi Əhməd Cavad ilə Mehmet Akif Ersoy və Kiprdə İstiqlal Marşı” mövzusunda konfrans keçirilib.
Konfrans çərçivəsində keçirilən panel iclasda Ankara Sosial Elmlər Universitetinin əməkdaşı, tədqiqatçı-alim Giyas Şüküroğlu “Azərbaycan istiqlal şairi Əhməd Cavad və Qafqaz İslam Ordusunda bir kiprli türk” mövzusunda məruzə ilə çıxış edərək, Əhməd Cavadın milli mübarizə illərindəki fəaliyyəti, “Çırpınırdı Qara dəniz” əsərinin yaranma tarixi və faciəli taleyi barədə məlumat verib.
Tədqiqatçı Şerif Avşar isə “Kiprdə Mehmet Akif Ersoy və İstiqlal Marşı” mövzusunda çıxış edərək marşın 1921-ci ildən etibarən Kipr türk mətbuatında yayılması və Britaniya idarəçiliyi dövründə tətbiq olunan qadağalara baxmayaraq xalq tərəfindən qorunub saxlanılmasından danışıb.