Kipr Prezidenti Nikos Xristodulides Aİ liderlərini Birliyin təhlükəsizliyinə təhdidlərə və hər şeydən əvvəl, ərazisinə hipotetik xarici hücuma qarşı koordinasiyalı cavab hazırlamağa başlamağa çağırdı. Ada dövlətinin lideri öz çağırışını Avropa Şurasının saytında yerləşdirib.
“Kiprdə görüşən Avropa İttifaqı liderləri hücuma məruz qalan bir Aİ ölkəsinin tərəfdaşlarından kömək istəməsi halında fəaliyyət planı hazırlamağa başlamalıdırlar”, – deyə Xristodulides bildirib. Aİ sammiti aprelin 23-də Kiprdə başlayacaq.
Bu ərəfədə Kipr hökumətinin rəsmi sözçüsü nazir Konstantinos Letimpiotis bildirib ki, martın əvvəlində Kiprin Akrotiri şəhərindəki Britaniya hərbi bazasına pilotsuz təyyarə hücumu kontekstində “Nikosiya, [Aİ ölkəsinə hücum halında qarşılıqlı müdafiə məqsədilə Avropa İttifaqı haqqında Müqavilənin] 42(7)-ci maddəsinə uyğun olaraq, Birliyin strateji muxtariyyətinin vacib sütunu kimi Aİ-nin qarşılıqlı yardım müddəasının institusional və praktiki cəhətdən gücləndirilməsinə xüsusi əhəmiyyət verir”. Bu müddəaya əsasən, Aİ üzv dövlətləri silahlı təcavüzün qurbanı olmuş tərəfdaş ölkəyə yardım və dəstək göstərməyə borcludurlar. (Tass)