Koreya Respublikası (KR) Prezident Li Çje Myonqun Türkiyədə keçirilən NATO sammitində iştirakı münasibətilə Ukraynaya 100 milyon dollar humanitar yardım ayıracağını açıqladı. Bu barədə Koreya Respublikası Prezident Administrasiyası məlumat verib.
Li Ce Myonq NATO-nun Hind-Sakit Okean regionundakı dörd tərəfdaşından biri kimi Ankarada keçirilən NATO sammitinə dəvət olunub. Milli təhlükəsizlik müşaviri Vi Sonq-lak sammitin ilk günündə keçirilən brifinqdə bildirib ki, “Ukraynaya 100 milyon dollarlıq hərtərəfli yardım göstərməyi vəd etməklə beynəlxalq sülhə və sabitliyə töhfə vermək öhdəliyimizi nümayiş etdirdik”.
Adının açıqlanmasını istəməyən yüksək vəzifəli administrasiya rəsmisi yeni paketin humanitar yardımla məhdudlaşacağını və silahları əhatə etməyəcəyini bildirib. “Ukraynaya yardımla bağlı mövqeyimizdə heç bir dəyişiklik olmayıb. Biz ölümcül silahlar tədarük etmirik”, – deyə rəsmi bildirib. Lakin onun sözlərinə görə, Cənubi Koreya hakimiyyəti vəsaitlərin necə istifadə olunacağı ilə bağlı hələlik yekun qərar verməyib.
2022-ci ildən bəri Koreya Respublikası Ukraynaya birbaşa silah və sursat tədarük etməyib, lakin dəbilqə kimi ölümcül olmayan hərbi avadanlıqlar təmin edib. Stokholm Beynəlxalq Sülh Araşdırmaları İnstitutunun (SIPRI) məlumatına görə, Koreya Respublikası 2021-ci ildən 2025-ci ilə qədər ABŞ-dan sonra Avropa NATO ölkələrinə ikinci ən böyük silah tədarükçüsü olub. (Tass)