Küveyt Daxili İşlər Nazirliyi bildirib ki, dəniz yolu ilə ölkəyə qanunsuz daxil olmağa cəhd etdikdən sonra saxlanılan dörd nəfər İslam İnqilabı Keşikçiləri Korpusunun (İİKK, İranın elit hərbi bölməsi) üzvləri olduqlarını və əmirliyə qarşı “düşmənçilik hərəkətləri” planlaşdırdıqlarını etiraf ediblər.
Nazirliyin bəyanatında qeyd olunur ki, saxlanılanlar dindirmə zamanı 1 mayda Küveytin təhlükəsizliyi və sabitliyinə qarşı “düşmənçilik hərəkətləri” həyata keçirmək üçün balıqçı gəmisində “Bubiyan adasına sızmaq tapşırığı aldıqlarını” bildiriblər. Daxili İşlər Nazirliyi həmçinin bildirib ki, adada Küveyt hərbçiləri ilə baş verən toqquşma zamanı cinayətkarlar atəş açaraq bir hərbçini yaralayıblar. Qrupun iki üzvü qaçıb.
Mayın 3-də Küveyt Müdafiə Nazirliyinin sözçüsü polkovnik Səud əl-Ətvan silahlı qüvvələrin ölkənin ərazi sularına sızma cəhdinin qarşısını aldığını və Küveytə qanunsuz yolla girməyə çalışan dörd şəxsi saxladığını açıqladı. (Tass)