Qırğızıstanın Edelveys təlim mərkəzinin ərazisində Kollektiv Təhlükəsizlik Müqaviləsi Təşkilatının (KTMT) Mərkəzi Asiya Regionunun Kollektiv Çevik Yerləşdirmə Qüvvələrinin (CRDF CAR) “Sərhəd-2025” komanda-qərargah təlimləri başlayıb. Bu barədə Respublika Müdafiə Nazirliyinin mətbuat xidmətindən məlumat verilib.
Təlimlərdə Qırğızıstan, Qazaxıstan, Rusiya, Tacikistanın hərbi kontingentləri, Birləşmiş Qərargahın və KTMT Katibliyinin əməliyyat qrupları iştirak edir. İdarədən verilən məlumata görə, iştirakçıların ümumi sayı təxminən 1200 nəfər və 500 ədəd hərbi və xüsusi texnika, o cümlədən təyyarələr, helikopterlər, pilotsuz uçuş aparatları və döyüş katerləridir.
Açılış mərasimində Qırğızıstan müdafiə nazirinin müavini Erlis Terdikbayev deyib: “Ölkələrimizin qarşısında ümumi vəzifələr durur – KTMT məkanında suverenliyin, ərazi bütövlüyünün və sabitliyin qorunması. Dünyada vəziyyət qeyri-sabitdir və biz istənilən çağırışlara hazır olmalıyıq: transmilli təhdidlərdən tutmuş regionumuzda sabitliyin pozulması cəhdlərinə qədər”.
Öz növbəsində, Kollektiv Təhlükəsizlik Müqaviləsi Təşkilatının baş katibi İmanqali Tasmaqambetov qeyd edib ki, “Mərkəzi Asiya regionu dövlətləri üçün əsas təhlükə radikal ekstremist qrupların Yaxın Şərqdən region dövlətlərinin cənub sərhədlərinə doğru hərəkət etməsi, ölkələrimizin ərazisində öz ideologiyasını yayması, gəncləri terror təşkilatlarına cəlb etməsinin real imkanlarıdır”. “Bu şəraitdə döyüş vəzifələrini uğurla həll etmək üçün milli silahlı qüvvələr, region dövlətlərinin digər təhlükəsizlik qurumları və KTMT Kollektiv Qüvvələri arasında aydın qarşılıqlı fəaliyyət lazımdır”, – o vurğulayıb. (Tass)