Reuters yerli iqtisadçılara istinadən xəbər verir ki, Qəzza zolağının sakinləri anklavın banklarında ciddi nağd pul çatışmazlığı ilə üzləşiblər.
Oktyabrın 10-da atəşkəsin qüvvəyə minməsindən bir neçə gün sonra, oktyabrın 16-da Qəzzada banklar fəaliyyətini bərpa edib. Lakin əskinas çatışmazlığı səbəbindən müştərilərə nağd pul verilməsini demək olar ki, tamamilə dayandırıblar.
Qəzzalı iqtisadçı Məhəmməd Əbu Cayab agentliyə bildirib ki, “Banklar açıqdır, kondisionerlər işləyir, lakin onlar əsasən elektron əməliyyatlarla məşğul olurlar, depozit qoymurlar, nağd pul çıxarmazlar”.
Bununla belə, yerli mağazalarda elektron ödəniş imkanları məhdud olduğundan, sakinlərin ərzaq məhsulları və digər zəruri malları ödəmək üçün əskinaslara ehtiyacı var. Bəzi pərakəndə satıcılar bank köçürmələrini qəbul edirlər, lakin onlar əlavə haqq alırlar. (Tass)