Rusiya İrəvan və Ankara arasında münasibətlərin normallaşması üçün erməni və türk tərəfdaşlarının səylərini dəstəkləməyə hazırdır. Bunu Rusiya Xarici İşlər Nazirliyinin sözçüsü Mariya Zaxarova brifinqdə deyib.
“Biz Ermənistan Respublikası ilə Türkiyə Respublikası arasında münasibətlərin normallaşmasına Cənubi Qafqazda davamlı sülhün bərpası və davamlı inkişafın təmin edilməsi üçün ilkin şərt kimi baxırıq. Biz erməni və türk tərəfdaşlarımızın bu istiqamətdə, o cümlədən 3+3 regional əməkdaşlıq proqramı çərçivəsində səylərini dəstəkləməyə davam etməyə hazırıq”.
Zaxarova vurğulayıb ki, Rusiya ardıcıl olaraq iki qonşu dövlət arasında mümkün olan ən sürətli barışığın tərəfdarıdır. “Düşünürəm ki, bizim ölkəmiz və şəxsən Rusiyanın xarici işlər naziri Sergey Lavrovun neçə dəfə bu mövzuya həsr olunmuş beynəlxalq görüşlərdə iştirak etdiyini xatırlayırsınız”, o əlavə edib.
Rusiya Xarici İşlər Nazirliyinin rəsmi sözçüsü qeyd edib ki, Rusiya Ankara ilə İrəvan arasında sazişlər hazırlanarkən yerli reallıqların və qonşularının Cənubi Qafqazdakı uzunmüddətli maraqlarının lazımi qaydada nəzərə alınacağını gözləyir. “Buna nail olmaq üçün onsuz da çətin olan danışıqlar prosesinə regiondankənar oyunçuların dağıdıcı müdaxiləsini istisna etmək vacibdir” deyə o, yekunlaşdırıb. (Tass)