Son illər aparılan araşdırmalar səhər erkən oyanmağın həm fiziki, həm də psixoloji sağlamlığa müsbət təsir göstərdiyini ortaya qoyur. Ritorika.az xəbər verir ki, günə erkən başlamaq insanın gündəlik ritmini daha nizamlı qurmasına və məhsuldarlığını artırmasına kömək edir.
Araşdırmamıza əsasən, səhər tezdən duran insanların bioloji saatı (sirkadiyan ritmi) daha stabil olur. Bu isə yuxu keyfiyyətinin yaxşılaşmasına, gün ərzində yorğunluğun azalmasına səbəb olur. Erkən oyanan şəxslərdə depressiya və narahatlıq hallarına daha az rast gəlinir.
Eyni zamanda, səhər erkən durmaq zehni fəaliyyətə də müsbət təsir göstərir. Səhər saatlarında beyin daha aydın işləyir, diqqət toplamaq və qərar vermək asanlaşır. Bu səbəbdən erkən oyanan insanlar iş və təhsil həyatında daha planlı və məhsuldar ola bilirlər.
Sağlamlıq baxımından da səhər tezdən durmağın faydaları vurğulanır. Günün erkən saatlarında oyanan şəxslər səhər yeməyini buraxmır, bu isə maddələr mübadiləsinin sürətlənməsinə və çəkinin daha rahat nəzarətdə saxlanmasına imkan yaradır. Bundan əlavə, səhər günəş işığına məruz qalmaq D vitamini sintezini və hormon balansını dəstəkləyir. Erkən duran insanlar gün ərzində fiziki aktivliyə daha çox vaxt ayırır, idman və gəzinti kimi vərdişləri daha asan formalaşdırırlar. Bu da ümumi sağlamlıq göstəricilərinin yaxşılaşmasına şərait yaradır.
Səhər erkən durmağın faydalı olması üçün əsas şərt kifayət qədər və keyfiyyətli yuxudur. Yəni gec yatıb erkən durmaq deyil, düzgün yuxu rejimi ilə erkən oyanmaq sağlam həyat tərzinin əsas elementlərindən biri hesab olunur.
Ritorika.az