Son günlər əhali arasında mövsümi qrip və digər respirator xəstəliklərin yayılması müşahidə olunur. Ritorika.az xəbər verir ki, havaların soyuması, qapalı məkanlarda vaxtın artması və immun sisteminin zəifləməsi xəstəliyin daha sürətlə yayılmasına şərait yaradır.
Mövsümi qrip əsasən hava-damcı yolu ilə yoluxur. Xəstə şəxslərin öskürməsi, asqırması və ya yaxın təması virusun ötürülməsində əsas rol oynayır. Bu səbəbdən qoruyucu tədbirlərə riayət etmək xüsusilə vacib sayılır.
İlk növbədə şəxsi gigiyena qaydalarına ciddi əməl etmək tövsiyə edilir. Əllərin tez-tez sabunla yuyulması və ya dezinfeksiyaedici məhlullardan istifadə virusun yayılma riskini azaldır. Eyni zamanda, öskürək və asqırma zamanı ağız və burnun salfetlə və ya dirsəklə örtülməsi vacib hesab olunur.
Qapalı və insanların sıx toplaşdığı məkanlarda maska istifadəsi də tövsiyə olunur. Xüsusilə xəstəlik əlamətləri olan şəxslərin maska taxması ətrafdakıların qorunmasında mühüm rol oynayır. Xəstə şəxslərlə yaxın təmasdan mümkün qədər uzaq durmağı məsləhət görülür.
Bundan əlavə, sağlam həyat tərzi immun sisteminin gücləndirilməsində mühüm amil sayılır. Kifayət qədər yuxu, balanslı qidalanma, vitamin və minerallarla zəngin qidaların qəbulu, bol maye içmək orqanizmin müqavimətini artırır.
Həmçinin risk qrupuna daxil olan şəxslərə, yaşlılara, xroniki xəstəlikləri olanlara və uşaqlara, qripə qarşı peyvəndin xüsusilə vacib olduğunu bildirilir. Peyvənd xəstəliyin ağır keçmə riskini əhəmiyyətli dərəcədə azaldır.
Qeyd olunur ki, yüksək hərarət, uzunmüddətli öskürək, nəfəs darlığı və güclü halsızlıq hallarında vaxt itirmədən həkimə müraciət etmək lazımdır.
Sadə, lakin effektiv qoruyucu tədbirlərə əməl etməklə mövsümi qripin yayılmasının qarşısını qismən almaq və sağlamlığı qorumaq mümkündür.
Ritorika.az