Suriya keçid hökumətinin daxili təhlükəsizlik qüvvələrinin xüsusi təyinatlıları şimali Hələbdə kürdlərin yaşadığı məhəllələri təmizləmək üçün əməliyyat keçirir. Bu barədə Ərəb Respublikası Daxili İşlər Nazirliyinin Syria TV kanalında yayımlanan bəyanatında bildirilir.
Mətndə deyilir: “Döyüşçülərimiz sabitliyi bərpa etmək və Hələb sakinlərini Kürd Suriya Demokratik Qüvvələri (SDF) ilə əlaqəli silahlı qruplardan qorumaq planının bir hissəsi olaraq Əşrəfiyə və Şeyx Məqsud məhəllələrinə daxil olublar”.
Suriya hakimiyyəti həmçinin Əşrəfiyyə, Bəni Zeid, Siryan, Hülaku, Şeyx Məqsud və Əl-Meydan məhəllələrində komendant saatı elan edib və bu, sonrakı xəbərdarlığa qədər qüvvədə qalacaq. Kürd silahlılarının bir neçə ərazidə göstərdiyi şiddətli müqaviməti nəzərə alaraq, ordunun gücləndirilmiş qüvvələri və zirehli texnikalar Hələbin şimalına göndərilib.
Öz növbəsində, SDF komandiri Məzlum Əbdi Dəməşq hökumətinin problemləri həll etmək üçün güc tətbiq etməsini pisləyib. O, hakimiyyəti “şimal Hələbdə əhalinin demoqrafik tərkibini dəyişdirmək” cəhdlərinə qarşı xəbərdar edib. Əbdi qeyd edib ki, “böhranın həlli üçün danışıqlar zamanı şəhər ərazilərinə tankların və ağır silahların yerləşdirilməsi anlaşma əldə etmək şanslarını sarsıdır”.
SDF-in məlumatına görə, Suriyanın şimal paytaxtında baş verən şiddətli atışma nəticəsində ən azı 12 nəfər ölüb, aralarında qadınlar və uşaqlar da olan 64 nəfər yaralanıb. (Tass)