İngiltərə və Uels üzrə Baş prokuror Riçard Hermerin tövsiyəsindən sonra Britaniya kəşfiyyat xidmətləri və hərbçiləri ABŞ-a Karib dənizində gəmiçilik hərəkətləri ilə bağlı kəşfiyyat məlumatı verməyi dayandırıblar. Bu barədə Britaniyanın “The Times” qəzeti mənbələrə istinadən məlumat yayıb.
Onların sözlərinə görə, Hermer bu qənaətə Böyük Britaniyanın ABŞ-ın Karib dənizində gəmilərə endirdiyi zərbələrdə iştirakına görə beynəlxalq məhkəməyə məruz qala biləcəyindən narahat olduğu üçün gəlib. Bundan əvvəl britaniyalılar narkotik maddə daşımaqda şübhəli bilinən qayıqların koordinatlarını, eləcə də göyərtəsində olan insanların sayını amerikalılarla bölüşmüşdülər. Amerikanın CNN televiziya kanalı ilk dəfə noyabrın 12-də Böyük Britaniyanın Karib dənizindəki gəmilərlə bağlı ABŞ-a kəşfiyyat məlumatı verməsini dayandırdığını bildirib.
“Biz düzgün olanı etməliydik. Bu, Riçardın tövsiyəsi idi”, – mənbə The Times-a bildirib. Qəzetin qeyd etdiyi kimi, tövsiyələrdə bildirilirdi ki, Britaniya beynəlxalq sularda ABŞ-dan daha sərt davranış qaydalarına imza atıb və BMT-nin “məhkəmədən kənar qətllər” adlandırdığı cinayətlərdə şərik ola bilər.
Böyük Britaniya hökuməti kəşfiyyat məlumatlarının mübadiləsinin dayandırılması ilə bağlı şərh verməkdən imtina edərək, yalnız ABŞ-ın “müdafiə, təhlükəsizlik və kəşfiyyat məsələlərində Böyük Britaniyanın ən yaxın tərəfdaşı” olaraq qaldığını bildirib. (Tass)