ABŞ Prezidenti Donald Tramp Gürcüstanın Baş naziri İrakli Kobaxidzeyə ünvanladığı məktubda iki ölkə arasında münasibətləri gücləndirmək istəyini bildirib. Bu barədə Gürcüstan hökumətinin mətbuat xidməti məlumat yayıb.
Məlumata görə, Tramp məktubu Kobaxidzenin ABŞ müstəqilliyinin 250 illiyi münasibətilə təbriklərinə cavab olaraq göndərib.
Məktubda deyilir: “Diqqətinizə görə səmimi qəlbdən minnətdaram. Suverenliyi, təhlükəsizliyi və uzunmüddətli rifahı dəstəkləmək üçün birlikdə çalışaraq əhəmiyyətli irəliləyişlərə nail ola bilərik. Daha təhlükəsiz, çiçəklənən və dinc gələcəyə doğru birlikdə irəliləyə bilməyimiz üçün əməkdaşlığımızı gücləndirməyi səbirsizliklə gözləyirəm”.
Tramp həmçinin qeyd edib ki, o, ABŞ ilə ortaq idealları bölüşən tərəfdaşlarla dostluğa dəyər verir. (Tass)