İsrail hakimiyyəti Türkiyəni yəhudi dövləti üçün yeni bir təhdid kimi təqdim etməklə sırf daxili siyasi məqsədlər güdür. Bu kurs regional və qlobal təhlükəsizliyə təhdid yaradır. Bu barədə Türkiyə Prezidenti Rəcəb Tayyib Ərdoğanın kommunikasiya rəhbəri Burhanəddin Duran bildirib.
Duran X-dəki açıqlamasında bildirib ki, “İsrail Baş nazirinin Benyamin Netanyahunun ofisinin prezidentimiz Rəcəb Tayyib Ərdoğana qarşı verdiyi hədsiz və əsassız açıqlamalar müharibə cinayətləri və insanlığa qarşı cinayətlərə görə məsuliyyətdən yayınan [İsrail] hökumətinin acizliyinin daha bir sübutudur. Netanyahu administrasiyasının Türkiyəni yeni bir təhdid kimi təqdim etmək cəhdi bu ucuz siyasətin bir hissəsidir. Daxili siyasi rəqabət naminə həyata keçirilən təhdid siyasəti və gərginliyi artırmaq istəyi təkcə İsrail cəmiyyəti üçün deyil, həm də regional və qlobal sülh və sabitlik üçün ciddi təhlükə yaradır”.
Daha əvvəl bildirilmişdi ki, cümə günü Türkiyə Ədliyyə Nazirliyi Daxili İşlər və Xarici İşlər Nazirliklərindən İnterpolun qırmızı bildirişi vasitəsilə Netanyahunun insanlığa qarşı cinayətlər və soyqırım ittihamları ilə beynəlxalq axtarışa verilməsini istəyib. Sumud humanitar donanması işini dinləyən 11-ci İstanbul Ağır İşlər Məhkəməsi iyul ayında Netanyahu və 30-dan çox təqsirləndirilən şəxs üçün insanlığa qarşı cinayətlər, soyqırım, həbs, qəddar rəftar, qəsdən bədən xəsarəti yetirmə, soyğunçuluq və nəqliyyat vasitəsinin müsadirə edilməsi ittihamları ilə həbs qərarı çıxarıb. (Tass)