Ermənistanın baş naziri Nikol Paşinyan bildirib ki, hökumət üzvlərinin onun fikrinə zidd mövqe tutmağa, xüsusən də Ermənistanın elektrik şəbəkələri şirkəti məsələsində ixtiyarı yoxdur.
Jurnalistin hökumətin arbitraj məhkəməsinin “Elektrik şəbəkələri” ilə bağlı qərarının məcburiliyini tanıması ilə bağlı qeydinə Paşinyan hiddətlə cavab verib ki, belə bir şey yoxdur. “Kim dedi ki, hökumət Stokholm Arbitraj Məhkəməsinin qərarının məcburiliyini tanıyır? Kim belə mövqe bildiribsə, bəyanat yazıb getsin. Belə mövqe ola bilməz”, – Paşinyan bildirib.
Bu barədə Ermənistanın hökumət aparatının beynəlxalq hüquqi məsələlər üzrə nümayəndəsinin ofisinin məlumat verdiyini eşidən Paşinyan belə cavab verib: “Mən hökumətəm və heç kimin mənim mövqeyimə zidd mövqeyi ola bilməz. Ümumiyyətlə, hakimiyyətdə mövqeyi mənim fikrimə zidd olan şəxslər varsa, indidən ərizə yazsınlar və binanı tərk etsinlər, yoxsa, mən onları özüm çıxaracam”.
Paşinyan əmin edib ki, hökumət Arbitraj mübahisəsində qalib gəlib və bu məsələ artıq bağlanıb. (Tass)